चौथो हप्तामा ‘अञ्जिला’लाई करिब १४० शो, बढ्दो ब्यापार

लेन्सनेपाल २०८१ चैत्र २१

चलचित्र ‘अञ्जिला’ प्रदर्शनको चौथो हप्तामा प्रवेश गरेको छ । माउथ पब्लिसिटी अब्बल हुँदा त्यसको प्रभाव चलचित्रले ब्यापारमा सकारात्मक देखिएको छ ।

पछिल्लो साता चलचित्रकी मुख्य कलाकार तथा नेपाली महिला राष्ट्रिय फुटबल टिमकी कप्तान एन्जिला तुम्बापो सुब्बा आफै देशका बिभिन्न शहरहरुमा पुगेर दर्शकसँग साक्षात्कार समेत गरेकी थिइन । एन्जिलाको हल भिजिटले चलचित्र प्रति दर्शकको क्रेजि थप बढाएको छ । फागुन २९ गते फागु पूर्णिमाको दिन रिलिज भएको चलचित्रले चौथो हप्ताको पहिलो दिन करिब १४० शो प्राप्त गरेको छ, जुन रिलिजको पहिलो दिनको तुलनामा लगभग दोब्बर हो ।

चलचित्रमा कप्तान एन्जिलाको बाल्यकालदेखि खेल जीवनसम्मको सङ्घर्ष र सफलताको कथा प्रस्तुत गरिएको छ । यसमा एन्जिलासँगै प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारहरूको अभिनय रहेको छ ।

चलचित्रको प्रचारलाई थप बलियो बनाउन सुब्बाले काठमाडौं, धरान, इटहरी, झापा, विराटनगर, पोखरा र नेपालगन्ज लगायतका स्थानमा उनले दर्शकसँग भेटघाट गर्दै ‘अञ्जिला’ हेर्न आमन्त्रण गरिरहेकी छिन् । एन्जिला गत शुक्रवार ग्रिसबाट नेपाल आएकी थिइन् । उनले हाल ग्रिसको शीर्ष डिभिजनको महिला फुटबल लिगमा निस एट्रोमिटौबाट खेलिरहेकी छिन् । यही खेलको लागि उनी केही महिनायता ग्रिसमा नै रहेकी थिइन् । एन्जिलाको यो भ्रमण विशुद्ध चलचित्रको लागि हो । प्रचार सकेर उनी पुनः ग्रिस फर्किनेछिन् ।