ढोरपाटनबाट चलचित्र ‘ऐरी’को छायांकन शुरु

लेन्सनेपाल २०८२ बैशाख ३१

‘ऐरी’को छायांकन सेटमा अभिनेता प्रदीप खड्का । तस्विरः ‘ऐरी’ निर्माण टिम ।

चलचित्र ‘ऐरी’को छायांकन शुरु भएको छ । जीवन थापाको निर्देशन रहेको चलचित्रको छायाँकन पश्चिम बागलुङको ढोरपाटन उपत्यकाबाट शुरु गरिएको हो ।

५० दिन सम्म चलचित्रको छायांकन ढोरपाटनमा हुने जनाइएको छ । त्यसपछि काठमाडौं र भारतमा समेत छायांकन गरिने निर्माण पक्षले जनाएको छ ।

बुधबारबाट शुरु भएको छायाँकनमा अभिनेता प्रदीप खड्का, अभिनेत्री चुम दरङ लगायत सहभागी भएपनि अर्को अभिनेता धीरज मगर र भुटानी अभिनेता सांगे सेल्ट्रिम आगामी साता मात्र छायांकन स्थल पुग्नेछन् । बलिउडका केही टेलिचलचित्र र चलचित्रमा समेत काम गरेकी अभिनेत्री चुमको यो पहिलो नेपाली चलचित्र हो । उनले केही समय नेपाली भाषा समेत सिकेको जनाइएको छ ।

नेपाली र हिन्दी भाषामा बन्ने चलचित्रको छायाँकन सेड्युल ३ महिना रहेको छ । यद्यपी भीएफएक्समा लामो समय लाग्ने भएकोले एक वर्षमा चलचित्रको निर्माण सकिने जनाइएको छ ।