चलचित्र ‘पहाड’ निर्माणको औपचारिक घोषणा

लेन्सनेपाल २०८१ माघ २

चलचित्र ‘पहाड’ निर्माणको औपचारिक घोषणा गरिएको छ । तुलसी घिमिरेको निर्देशन रहने चलचित्रको शिर्षक भिडियो सार्वजनिक गर्दै निर्माण घोषणा गरिएको हो ।

माघ ६ गतेदेखि छायांकन गर्ने तयारी रहेको चलचित्रको सार्वजनिक टाइटल मोसनलाई ट्राइडेन्ट भिएफएक्सका सुनिल थापाले तयार गरेका हुन् भने पोस्टर डिजाइन रोयल भीमसेन र ट्राइडेन्ट कन्सेप्टले गरेको हो ।

पछिल्लो समय बढ्दो बसाइँसराइले रित्तिँदै गएको पहाडी भूगोलको कथामा चलचित्र बन्ने जनाइएको छ । विपिन कार्की, मदनकृष्ण श्रेष्ठ, सुनील थापा, अरुण क्षेत्री र पञ्चमी घिमिरेको अभिनय रहने छ । पञ्चमी निर्देशक घिमिरेकी कान्छी छोरी हुन् । उनले यही चलचित्रबाट नेपाली रजतपटमा डेव्यु गर्दैछिन् ।

ओजश्वी केसी निर्माता रहेको चलचित्रमा निर्देशक घिमिरेकै लेखन, प्रमोद प्रधानको डिओपी र रञ्जित गजमेरको संगीत रहने छ ।