चलचित्र ‘अगस्त्य’को प्रदर्शन शुरु

लेन्सनेपाल २०८० फागुन १८

सौरभ चौधरीको निर्देशन रहेको चलचित्र ‘अगस्त्य’ आजबाट प्रदर्शन भएको छ । चलचित्रले मल्टीप्लेक्सहरुमा उच्च शो पाएको छ । चलचित्रका प्रचार सामग्रीले हाइप क्रियट गर्नुका साथै कलाकारको बलियो लाइनअपका कारण चलचित्र प्रति धेरैको चासो देखिन्छ । ‘वर्ड अफ माउथ’ बलियो भएमा चलचित्रले राम्रो ब्यापार गर्ने प्रक्षेपण गरिएको छ ।

नेपालको तराई क्षेत्र र भारतको गोरखपुरमा छायांकन गरिएको चलचित्रमा सौगात मल्ल, नाजिर हुसेन, मलिका महत, विजय बराल, रवीन्द्र झा, शिशिर वाङ्गदेल, बेन बस्नेत लगायतको अभिनय छ भने निश्चल बस्नेत केमियो भूमिकामा छन् ।

अभिनेता सौगात मल्ल एक्सन अवतार र मानसिक सन्तुलन गुमेको चरित्रमा प्रस्तुत छन् । दर्शकलाई हलमा आकर्षित गर्ने यही ठूलो आधार मानिएको छ ।

निर्देशक चौधरी स्वयंको लेखन रहेको चलचित्रका निर्माता प्रकाश मल्ल, अनिष तामाङ र बिनोद पौडेल हुन् । यस्तै कार्यकारी निर्मातामा विश्व गौचन र अभिषेक चौधरी रहेका छन् ।