शोभित बस्नेत निर्देशित चलचित्र ‘पीआर’ हङकङ–मकाउ र पोर्चुगलमा पनि प्रदर्शन हुने भएको छ । निर्माण पक्षले हङकङ र पोर्चुगलमा प्रदर्शन अधिकारी विक्री गरेको जानकारी दिएको छ ।

निर्देशक बस्नेतका अनुसार हङकङमा प्रदर्शन अधिकार हिमालयस क्राफ्ट एचके लिमिटेडका निर्देशक आकाश बन्जाराले किनेका हुन् । त्यसै गरि पोर्चुगलका लागि कावासोती पोर्चुगल संघका प्रतिनिधि सुकदेव अधिकारी र महेश न्यौरेले प्रदर्शन अधिकार लिएका छन् । यो सँगै नेपाल सहित जापान, अष्ट्रेलिया, न्युजल्याण्डसँगै हङकङ र पोर्चुगलमा पनि ‘पीआर’ प्रदर्शन हुने छ ।

निर्देशक बस्नेतले अन्य देशमा पनि चलचित्र प्रदर्शनका लागि कुराकानी भइरहेको जनाए । चलचित्रका प्रस्तुतकर्ता रञ्जित साह (आरएफएम फ्यासिलिटी म्यानेजमेन्ट) र सन्तोष तिवारी (क्यारियर्स गेटवे)का अनुसार पछिल्ला दिनमा विदेशबाट आएको माग निकै उच्च रहेको र यसले चलचित्रको अन्तर्राष्ट्रिय आकर्षण बढेको छ ।

यहि मंसिर २६ गतेबाट प्रदर्शन आउन लागेको चलचित्र एक महिनाअघि अष्ट्रेलियाकै विभिन्न स्थानमा विशेष शो गरेको थियो । उक्त शो हेरेका अधिकांश दर्शकले चलचित्र राम्रो बनेको प्रतिक्रिया दिएका थिए । चलचित्रमा आर.ए.सुरज पौडेल, विनिता कार्की, राजन कुँवर, पूजा चौधरी, आश्मा अधिकारी मस्तानी, विमला खत्री, गणेश बुढाथोकी, म्याक्स कृष्ण थापा र नवीन घायलको अभिनय छ भने विशेष भूमिकामा नीर शाह, गौरी मल्ल, रविन्द्र खड्का, उत्तम के.सी. र दिक्पाल कार्कीलाई पनि देख्न सकिन्छ ।

रञ्जित साह र सन्तोष तिवारीको प्रस्तुति रहेको चलचित्रमा लक्ष्मण सापकोटा र प्रदीप दाहालको लगानी छ । चलचित्र बन्दे प्रसादको सम्पादन,  गणेश बुढाथोकीको कथा, सौरभ सायमी र सौरभ लामाको छायाँकन र रामजी लामिछानेको कोरियोग्राफी रहेको छ ।