चलचित्र निर्देशकको अभिब्यक्तिको माध्यम हो । पर्दामा देखाईने हरेक विषयवस्तुको प्रस्तुति निर्देशकको सोच अनुसार फरक फरक हुने गर्छ । सायद यसैले होला अचेल कलाकार सँगै निर्देशकको नामले पनि चलचित्र थोरै–धेरै चल्न थालेका छन् ।

निर्देशक सुदर्शन थापा यतिबेला चलचित्रमा कलाकारको भन्दा मेकरको भूमिका महत्वपूर्ण हुने कुराको वकालत गरिरहेका छन् । आफ्नो चलचित्र ‘सम्हालिन्छ कहिले मन’को प्रचारमा व्यस्त सुदर्शनले आइतबार राजधानीमा सिमित सञ्चारकर्मीहरुसँग कुराकानी गर्दै यही कुरामा जोड दिएका छन् । मेकरलाई भन्दा कलाकारलाई बढी प्राथमिकता दिदा नेपाली चलचित्र चुक्दै गएको उनको ठम्याई छ । कलाकारलाई प्राथमितामा राखेर चलचित्रको पुरै भारि बोइने गरेको भन्दै उनले त्यसको सम्पूर्ण जिम्मा निर्देशशको काँधमा हुन्छ भन्ने भुल्न नहुने बताए ।

आफुले निर्देशन गरेको चलचित्र ‘सम्हालिन्छ कहिले मन’ बिदेशी ए ग्रेडकै चलचित्रको हाराहारिमा मेकिङ गरेको उनको भनाई छ । नेपाल वा नेपाल बाहिर जहाँ छायाँकन गरे पनि नेपाली चलचित्रमा नेपाली कै भावना हुने उनाको भनाई छ । लण्डनमा छायाँकन भएको यो चलचित्रले नेपाली भावनाकै प्रतिनिधित्व गर्नेछ । आफ्नो नजरमा चल्ने जति सबै राम्रा र नचल्ने जति सबै नराम्रा चलचित्र भएको भन्दै उनले ‘सम्हालिन्छ कहिले मन’ राम्रो हुने बिश्वास लिए ।

प्रेम कथाको चलचित्रमा आकाश श्रेष्ठ, पूजा शर्मा र गायक सोनम तोप्देनको समेत अभिनय छ । चलचित्र त्रिकोणात्मक प्रेम कथामा आधारित हरेको छ । आफुले माया गर्ने र आफुलाई माया गर्ने व्यक्ति बिचको प्रेमकथा चलचित्रमा देखाइएको छ । अभिनेत्री पूजा शर्माले आफ्नो वास्तविक जीवनसँग ‘सम्हालिन्छ कहिले मन’ को कथावस्तु निकट रहेको बताइन् । यस्तै अभिनेता आकाशले पनि चलचित्रमा आफ्नो यस अगाडिको भन्दा भिन्न भूमिका रहेको बताए । यसै चलचित्रमा अभिनयमा डेब्यु गरेका हुन् गायक​ सोनमले । उनले चलचित्रको कथा अनि आफ्नो भूमिका मन परेकोले अभिनय गरेको बताए ।

लण्डन, दुबई र नेपालको उपल्लो मुस्ताङमा छायांकन भएको चलचित्रको नाम गायक सुगम पोखरेलले करिब १२ वर्षअघि गाएको हिट गीतबाट राखिएको हो । भाद्र १७ गतेबाट प्रदर्शन हुने चलचित्र एबी इन्टरनेसनलको ब्यानरमा निर्माण भएको हो ।