शुक्रबार प्रदर्शनमा आउने चलचित्र ‘ह्यारीकी प्यारी’को मंगलबार प्रिमियर गरिएको छ । राजधानीको बिग मुभिजमा सम्पन्न भव्य प्रिमियरमा उपस्थित चलचित्रकर्मी, पत्रकार र अन्य पाहुनाहरुले चलचित्रलाई रुचाएका छन् ।

डा. कपिल रिजालको डेब्यु निर्देशन रहेको चलचित्रको विशेषगरि कथाबस्तुको धेरैले तारिफ गरेका छन् । साम्राज्ञी राज्यलक्ष्मी शाह, जितु नेपाल, विजय बराल, लक्ष्मी गिरी, सुवाष गजुरेल, रन्जना भट्टराई, सरला रिजाल लगायतका कलाकारहरुले पनि उपस्थित पाहुनाबाट तारिफ पाए ।

कसले के भने प्रिमियरमाः

मदनकृष्ण श्रेष्ठ (वरिष्ठ कलाकार)
आफुले कल्पनै नगरेको कथा पाएँ । कथा सरसर्ती अगाडी बढेको छ । एकछिनपनि आँखा झिमिक्क हुन दिंदैन । जितुलाई हिरोमा सुहाएको छ । निर्देशक रिजालको काम उत्कृष्ट छ ।

सन्तोष पन्त (वरिष्ठ कलाकार)
निर्देशक कपिल रिजाल जीले एउटा मनले चाहेको चलचित्र बनाउनु भएको छ । चलचित्रमा सुगठित शरीर भएको हिरो होइन मनको हिरो हुनुपर्छ भन्ने निर्देशकको परिकल्पना राम्रो लाग्यो । जितुको अभिनय राम्रो पाएँ । साम्राज्ञीले आफ्नो अभिनय निखारेको पाएँ । चलचित्रमा सुरुको दृश्यदेखि लिएर अन्तिमसम्म साम्राज्ञीको अभिनयमा विविधता पाएँ । एकदमै उत्कृष्ट चलचित्र । एकपटक हेरिदिनु होला ।

रमेश उप्रेती (अभिनेता)
जितुलाई बधाई दिन चाहन्छु । एकदमै राम्रो अभिनय गर्नु भएको छ । पटकथा उत्कृष्ट लाग्यो । समसामयिक लाग्यो विषयबस्तु । संदेशसहितको मनोरन्जनात्मक चलचित्र बनेको छ ।

केदार घिमिरे (हास्यकलाकार)
रमाइलो र उत्कृष्ट चलचित्रमा लाग्यो । बीचबीचमा भावुकपनि बनायो । लेखन, अभिनय र निर्देशन पक्ष राम्रो लाग्यो । निर्देशक ज्यूलाई बधाई भन्न चाहन्छु ।

दीपाश्री निरौला (निर्देशक÷कलाकार)
जितुको अभिनयको पहिलेदेखि फ्यान थिएँ । ‘ह्यारीकी प्यारी’मा उसले प्रमाणित गरेको छ । उसको अभिनयले आँखाबाट आँशु झारेको पत्तै भएन । साम्राज्ञीको पनि अभिनय राम्रो लाग्यो । यस्ता उत्कृष्ट चलचित्र बन्दा यसले यस क्षेत्रको जरा बलियो बनाउछ । ‘ह्यारीकी प्यारी’ दर्शकको प्यारो हुनेमा विश्वस्त छु ।

आकाश अधिकारी (निर्देशक÷कलाकार)
धेरैपछि मन छुने लभस्टोरी हेर्न पाउँदा मनैदेखि दंग छु । कपिल, जितु र साम्राज्ञी जीले एउटा पृथक लभस्टोरी पस्किनु भएको छ । टिमलाई सफलताको शुभकामना ।

किरण केसी (हास्यकलाकार)
जितुले लिडमा चलचित्र खेल्दैछ भन्दा एकदमै डर लाग्या थियो । अहिले चलचित्र हेर्दा डर मुक्त भएँ । एकदमै राम्रो अभिनय जितुको । निर्देशकले सानो सानो कुरा ध्यान पुर्याउनु भएको छ । कपिल रिजाल यो क्षेत्रको आवश्यकता हो । मेरो लागि ‘ह्यारीकी प्यारी’ ९९.९९ प्रतिशत उत्कृष्ट छ ।

शिवहरी पौड्याल (हास्यकलाकार)
चलचित्र क्षेत्रले खास जोडी भेट्टाए जस्तो लाग्यो । साम्राज्ञी र जितुको जोडी एकदमै सुहाएको छ । विषयबस्तुपनि फरक रहेछ । निर्देशक काम डेब्यु जस्तो लागेन । परिपक्कता पाएँ । जितुको भावुक अभिनय मज्जाको छ । साम्राज्ञीलाई फरक अभिनयमा पाएँ । सबैले हेरिदिनुस ‘ह्यारीकी प्यारी’ ।