अभिनेता शुशिल श्रेष्ठको आशा ‘बादशाह जुट’मा अडिएको छ । शुक्रबारबाट प्रदर्शन हुने चलचित्रले दर्शकको मन जित्नेमा उनी विश्वस्त छन् । बक्स अफिसमा फेरी एकपटक सफलताको झण्डा फहराउने सोचमा रहेका शुशिल चलचित्रलाई लिएर उत्साहित देखिन्छन् ।

आफुले बिगतमा गरेका चलचित्र भन्दा नितान्त फरक भुमिकामा काम गरेका कारण पनि थप उत्साहित भएको उनको भनाई छ । ‘बादशाह जुट’मा निभाएको जस्तो क्यारेक्टर आफुले विगतमा पनि नपाएको र भविष्यमा पनि पाउने आशा छैन उनलाई । त्यसैले पनि अन्य चलचित्रको तुलनामा निकै मेहनत गरेको बताउँछन् ।

लभरव्यायसँगै एक्सन भुमिकामा देखिएका शशिलले चलचित्रमा पत्रकारको भुमिकामा काम गरेका छन् । आफुलाई बादशाह ठान्ने दुई पात्रको वरिपरि चलचित्रको कथा घुमेको छ । जसमध्येको एक पात्र हो शुशिलको । शुशिल यो पात्रलाई न्याय गर्न केही नजिकका पत्रकारहरुसँग सल्लाह समेत गरेको बताउँछन् । मिडिया हाउसमा इन्टन गरिरहेको पत्रकार पात्र भएकोले यसले पत्रकारको कथा भने नभन्ने उनको स्पष्टोक्ति छ ।

निर्देशक जोनी सिंह राणा पनि चलचित्रले पत्रकारका पेशागत मर्यादा र सम्मानमा कुनै दखल नपुर्याउने जनाउँछन् । चलचित्रमा सुशीलका अलवा आमिर गौतम, रोविन तामाङ, रोशी खड्का, केइशा रावत, रश्मि पाण्डे, दीपक क्षेत्री, कमलमणि नेपाललगायतका कलाकारको अभिनय रहेको छ । भने, प्रियंका कार्की अतिथि भूमिकामा देखिनेछिन ।

चलचित्रलाई हर्क बहादुर कुँवर र भोज राज श्रेष्ठले संयुक्त रुपमा निर्माण गरेका हुन् । एच एण्ड बि फिल्मस् प्रा.लि. र गोल्डेन ग्रेप्स फिल्मस् एण्ड इन्टरटेनमेन्ट प्रा.लि.को संयुक्त व्यानरमा निर्माण भएको चलचित्रमा राज कुमार उप्रेतीको द्वन्द्व, उत्तम हुमागाईको छायाँकन, कृष्ण भारद्धाज, कोशिस क्षेत्री र मोहित मुनालको संगीत र दिर्घ खड्काको सम्पादन रहेको छ ।