साउण्ड डिजाइनर राजकृष्ण श्रेष्ठको निधन

लेन्सनेपाल २०८० बैशाख ७

वरिष्ठ साउण्ड डिजाइनर राजकृष्ण श्रेष्ठको निधन भएको छ । जण्डिसका कारण बिर अस्पतालमा उपचार गराइरहेका श्रेष्ठको उपचारको क्रममा बिहिबार निधन भएको हो ।

करिब डेढ महिना अगाडि स्वास्थ्यमा समस्या आएपछि क्षेत्रपाटी स्थित क्षेत्रपाटी निःशुल्क चिकित्सालयमा उपचार गराएका उनलाई थप उपचारका लागि बिर अस्पताल ल्याइएको थियो । उपचारका क्रममा बुधबार अचानक स्वास प्रश्वासमा थप समस्या देखिएको र बिहीबार विहान निधन भएको जनाइएको छ ।

ध्वनि प्राविधिक रुपमा आफ्नो चलचित्र यात्रा शुरु गरेका श्रेष्ठले तृष्णा, देउकी, प्रेयसी, झुमा, विद्रोह, वीर गणेशमान लगायतका चलचित्रमा साउण्ड डिजाइनरका रुपमा काम गरेका छन् । केही बिदेशी चलचित्रमा समेत काम गरेका श्रेष्ठले एनएफडिसी राष्ट्रिय चलचित्र पुरस्कार, नेफ्टा फिल्म अवार्ड, बक्स अफिस फिल्म अवार्डलगायतका अवार्ड समेत प्राप्त गरिसकेका छन् ।