चलचित्र ‘बादशाह जुट’को इण्डक्ल्याप, पौष १३ मा प्रदर्शन हुने

लेन्सनेपाल २०७५ असोज ९

चलचित्र बादशाह जुटको छायाँकन सकिएको छ । ललितपुरको श्रीकाली चौरमा एक गीतको छायाँकनसँगै चलचित्रको इण्डक्ल्याप गरिएको हो ।

निर्देशक जोनी सिंह राणाका बैशाख १० गतेबाट छायाँकन शुरु भएको यो चलचित्रको झण्डै ६० दिन छायाँकन गरिएको छ । अन्तिम दिन लोक फेलेवरको गीतको छायाँकन गरियो । गीतमा प्रियंका कार्की, शुशिल श्रेष्ठ, आमिर गौतमलगायतका कलाकारले कम्मर मर्काएका छन् । चलचित्रमा प्रियंका विशेष भुमिकामा देखिएकी छिन ।

चलचित्रलाई भोजराज श्रेष्ठले निर्माण गरेका हुन । दुई राजाको कथामा निर्माण भएको चलचित्रको छायाँकनमा आफुले कुनै पनि कुराको कमी हुन नदिएको उनको भनाई छ ।

चलचित्रको इण्डक्ल्यापसँगै प्रदर्शन मिति समेत सार्वजनिक गरिएको छ । यो चलचित्र अंग्रेजी नयाँ वर्षको अवसर पारेर पौष १३ गतेबाट प्रदर्शनमा आउने निर्माण पक्षले जनाएको छ ।

चलचित्रमा सुशिल श्रेष्ठ, आमिर गौतम, रविन तामाङ, रोशी खड्का, रश्मी पाण्डे, सुधा रावतलगायतका कलाकारको अभिनय रहेको छ ।

एच एण्ड बि फिल्मस् प्रा.लि. र गोल्डेन ग्रेप्स फिल्मस् एण्ड इन्टरटेनमेन्ट प्रा.लि.को संयुक्त व्यानरमा निर्माण भएको चलचित्रमा राज कुमार उप्रेतीको द्धन्द्व, विक्रम स्वारको कोरियोग्राफी, र दिर्घ खड्काको सम्पादन रहेको छ ।