चलचित्र ‘माग्ने राजा’को पोस्टर सार्वजनिक

लेन्सनेपाल २०८२ आषाढ ७

चलचित्र ‘माग्ने राजा’को फर्स्टलुक पोस्टर सार्वजनिक गरिएको छ । शुक्रबार प्रज्ञा डबलीमा आयोजित एक कार्यक्रमका बीच पोस्टर सार्वजनिक गरिएको हो ।

सार्वजनिक दुई पोस्टर मध्ये एउटामा अभिनेता केदार घिमिरे (माग्ने बुढा) कुर्सीमा पैसासहित राजकिय अवतारमा प्रस्तुत गरिएको छ । अर्को पोस्टरमा कलाकारहरु केदार घिमिरे, वर्षा सिवाकोटी र विल्सन विक्रम राईलाई स्थान दिइएको छ ।

भदौ ६ गतेबाट प्रदर्शन हुने चलचित्रलाई ऋषि लामिछाने निर्देशन गरेका हुन् । निर्देशक लामिछानेले ‘माग्ने राजा’ले आफैलाई राजाको रुपमा प्रस्तुत गर्ने युवापुस्ताको कथा देखाउने बताए । आरम्भ प्रोडक्सनको ब्यानरमा निर्माण भएको चलचित्रमा मुनाल घिमिरेको लगानी रहेको छ । घिमिरे हाल दाङको घोराही उपमहानगरपालिका वडा नम्बर ४ का वडा अध्यक्ष समेत हुन् ।

चलचित्रमा घिमिरे, सिवाकोटी र राईका अलवा पुष्कर गुरुङ, शिशिर वाङ्देल, शारदा गिरी र टिकटकर मिस पबीको पनि अभिनय छ । चलचित्रमा आर्यन सिग्देलको पनि विशेष भूमिका रहेको छ । चलचित्रमा नरेन्द्र मैनालीको छायांकन, सामीप्य राज तिमल्सेनाको लेखन र दीपक शर्मा र बाबुल गिरीको संगीत रहेको छ ।