गायक श्रेष्ठलाई ‘दीर्घसाधना सम्मान’ प्रदान गरिने

लेन्सनेपाल २०८२ आषाढ ५

गायक दीप श्रेष्ठलाई ‘दीर्घसाधना सम्मान’ प्रदान गरिने भएको छ । ५ दशकदेखि सांगीतिक क्षेत्रमा पुर्‍याएको योगदानको कदर गर्दै गायक श्रेष्ठलाई सङ्गीत तथा नाट्य प्रज्ञा प्रतिष्ठानले ‘दीर्घसाधना सम्मान’ प्रदान गर्ने भएको हो । प्रतिष्ठानले २ लाख रुपैयाँ नगद र ताम्रपत्रसहित उनलाई सम्मान गरिने जनाएको छ ।

४०० सयभन्दा बढी गीतमा स्वर दिएका श्रेष्ठले १८ वर्षको उमेरमा ‘म पत्थरको देवता होइन’ बोलको गीत रेकर्ड गर्दै साङ्गीतिक करियर शुरु गरेका थिए । श्रेष्ठले रेडियो नेपालबाट २०२७ साल र २०२८ सालमा पुरुषतर्फ उत्कृष्ट गायन उपाधि र २०३० सालमा स्वर्ण पदक प्राप्त गरेका थिए ।

प्रतिष्ठानले असार ११ गते राष्ट्रपति भवनमा आयोजना हुने समारोहमा सम्मान र पुरस्कार प्रदान गर्ने जनाएको छ । सोही अवसरमा ‘नेपाल सङ्गीत तथा नाट्य राष्ट्रिय प्रज्ञा पुरस्कार’ गायिका कुन्ती मोक्तान, वरिष्ठ सङ्गीत संयोजक राजु अग्रवाल, वरिष्ठ नृत्य निर्देशक भुवनदास श्रेष्ठ, वरिष्ठ रंगकर्मी हरिबहादुर थापा र वरिष्ठ नाटककार वेदकुमारी न्यौपानेलाई प्रदान गरिने प्रतिष्ठानले जनाएको छ ।

यस्तै, खोज तथा अनुसन्धान नृत्य विधातर्फ कृष्णप्रसाद पौडेल (नृत्यानन्द), नारायण रायमाझी र कुशेश्वरप्रसाद राईलाई पुरस्कार प्रदान गरिने जनाइएको छ । पुरस्कारको राशि एक लाख रुपैयाँ र ताम्रपत्र छ ।