गीतकार उपाध्यायद्वारा चेपाङ बस्तीमा लत्ताकपडा वितरण, गीतको पनि छायाँकन

लेन्सनेपाल २०७८ फागुन १२

समाजसेवामा सक्रिय कीर्तिमानी गीतकार तथा साहित्यकार डा. डीआर उपाध्यायले चितवनको चेपाङ बस्तीमा लत्ताकपडा वितरण गरेका छन् । चेपाङ पत्रकार नेपोलियन चेपाङको गाउँ रहेको जिमलिङ चौताराका ५५ घर परिवारलाई उपाध्यायले बुधबार लत्ता कपडा बितरण गरेका हुन् । सो अवसरमा उनले चेपाङ बस्तीमा खाना समेत खुवाएका थिए ।

जागरण सम्बन्धी आफ्नो एक गीतको छायाङ्कनका क्रममा उपाध्याय त्यहाँ पुगेका थिए । पिछडिएको चेपाङ समुदायका विषयमा गीत लेखिएको भएकोले छायाङ्कनका लागि आफु त्यहाँ पुगेको उपाध्यायले बताए ।

पत्नी सुनिता खनाल, पत्रकार कृष्ण भुसाल, निर्देशक माइकल चन्द, छायाँकार उत्सव दाहाल, कलाकार नम्रता अर्याल लगायतसहित उपाध्यक्ष चेपाङ बस्ती पुगेका हुन् । चेपाङका विविध समस्या र समाधानसम्बन्धी गीत भिडियो सहित चाडै नै श्रोतादर्शकमाझ ल्याउने डा. उपाध्यायले जानकारी दिए ।