समीर भट्टको जन्मदिनमा ‘बलिदान’ को प्रि–टिजर

लेन्सनेपाल २०८२ बैशाख १७

दशैंको फूलपातीमा प्रदर्शन हुने चलचित्र ‘बलिदान’ को प्रि–टिजर सार्वजनिक गरिएको छ । प्रि–टिजर चलचित्रका अभिनेता समीर भट्टको जन्मदिनको अवसर पारेर शुभकामना स्वरूप सार्वजनिक गरिएको हो ।

प्रि–टिजरमा अभिनेता विराज भट्टको देशभक्तिपूर्ण भावनाले भरिएको न्यारेशनमा समिरका एक्सन दृश्यहरू प्रस्तुत गरिएको छ । समिरले बोलेको “आमाको पिर, यो देशको शिर, कहिल्यै झुक्न नदिने सपुत हुँ म” भन्ने डायलगले उनको भूमिका देशभक्तिपूर्ण रहेको संकेत गरेको छ ।

चलचित्रका निर्देशक सन्तोष सेनका अनुसार समीरमा कलाकारिता र अभिनयका सबै गुण भरिएका छन्, र ‘बलिदान’ले ती सबै पक्ष उजागर गरेको छ । सेनले प्रि–टिजरलाई समीरको प्रस्तुतिको झलक भन्दै यो सिरिजमा थप झिल्काहरू क्रमशः सार्वजनिक गरिने जानकारी दिए ।

चलचित्रमा समीर भट्टसँगै सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी, प्रेम पुरीलगायतका कलाकारको अभिनय रहेको छ । आसुसेन फिल्म्स्‌ प्रा.लि. को प्रस्तुति रहेको यस चलचित्रका निर्माता पवन ब्राडफोर्ड बिस्ट हुन् भने प्रेम पुरी कार्यकारी निर्माता हुन् ।